Seipone News

BARUTWANA BA FOFIŠETŠWA CUBA GO ITHUTELA BONGAKA

Kgoro ya Maphelo mo profenseng ya Limpopo e tsebišitše gore e tla thuša barutwana ba lesome bao ba šomileng gabotse go yo ithutela bongaka kua Cuba. Se sengwe seo se bego se lebeletšwe ke gore naa morutwana o tšwa ka lapeng le lebjang ka ge go be go lebeletšwe ba go tšwa ka malapeng a masehla efela ba šomile gabotse.

Ka Laboraro barutwana bao ba ile ba direlwa monyanya wa taelano ke mebasepala ya gabobona e lego Modimolle le Mogalakwena. Badudi ba Mabatlane ba ile ba bothana holong ya Leseding go laelana le Dikeledi Lekoto yoo a bego a fofela nageng ya Cuba letšatši leo le latelang.

Diboledi ka go latelelana ga tšona di ile tša hlalosa ka tsela yeo di tsebang Dikeledi ka gona. Ba hlalositše gore ke ngwana wa go ba le tsebe, wa go hlompha, wa lerato, wa go rata kereke le dipuku le go se tlale mekgotha. Ba ile ba laetša gore ba ikgantšha ka yena gomme ba eletša barutwana bao ba bego ba tlile moketeng woo go tšea malebiši go Dikeledi. Ba ile ba botša Dikeledi gore a emele motse wa Mabatlane le masepala wa gabo ka makgethe gomme a šome ka maatla go feta pele.

Ka boripana Mosepikara wa masepala wa Modimolle, Cllr Sechele Sebolai o ile a re: “Bontšhi bja bana ba rena bao ba šomang gabotse dipoelong tša marematlou ba dula gae efela le lehlogonolo kudu lehono ka ge seo se fetogile. Barutwana ba ka ithuta se sengwe le se sengwe seo ba

ratang go ithuta sona go sa kgathalege gore ke kae.

Mokgatlo wa rena wa ANC le Kgoro ya Maphelo di beakantše sekhwama sa go thuša barutwana ba bongaka gomme re swanetše go leboga gape Tona ya Maphelo, Ngaka Aaron Motsoaledi ge a thekga taba ye.

Ge Dikeledi Lekoto a fetola o ile a re: “Ke leboga thekgo ya batho bohle bao ba tšereng karolo bophelong bja ka ka go nkaga le go ntlhahla gore ke fihle fa lehono. Mma wa ka Berth Lekoto ke leboga ka tsela yeo o re godišitšeng ka gona ka gae. Ke tšwa lapeng le lesehla gomme ke dira boipiletšo go barutwana ka nna gore ba se inyatše gore ba ka kgona go tšwelela bophelong go sa kgathalege gore o tšwa ka lapeng lefe. Seo se swanetšego go go hlohletša gore o kgone go fetola maemo a bophelo ka geno ka ge o ikemišeditše go dira seo. Ke leboga ba masepala wa selete le wa gae ka dimpho tšeo ba mphileng tšona”.

Masepaleng wa Mogalakwena le gona go ile gwa ba bjalo gomme Sefepisegolwane sa masepala woo se ile sa re: “Re leboga barutiši le bohle bao ba tšereng karolo go tšweletša naletšana ye ya ga Sekgala. Le ge go bile le mathata a dipuku dikolong tše dingwe, re dira boipiletšo gore barutwana ka moka go tšwa masepaleng wa rena ba šome ka maatla dithutong tša marematlou. Re dira boipiletšo go batswadi go tšea karolo maphelong le thutong tša bana ka ge seo se ba fa maatla o go šoma ka maatla.

DITSELA DI PALA GO FELA

Thanyani Masithi

SEKHUKHUNE: Badudi ba magaeng tikologong ya Sekhukhune masepaleng wa Makhuduthamaga le Ephraim Mogale ba na le pelaelo mabapi le go se fele ga ditsela tše pedi tšeo di lebileng Marble Hall.

Mošomo wa go tšhela sekontiri seo se kgaolang tsela ya motse wa Mogaladi go tšwa Phokwane o thomilwe ka kgwedi ya Hlakola ngwaga wa go feta. Thentara ya mošomo wa go dira sekontiri ya boleng bja R35milione e filwe rakonteraka ke Kgoro ya Ditsela le Dinamelwa mo profenseng.

Mo ngwageng wo ka kgwedi ya Dibokwane, rakonteraka Senyati o emišitše mošomo ka lebaka la go nyaka tšhelete yeo e šaletšeng ya go balelwa go R10 milione. “Mošomo wo o šetšeng wa go fetšiša sekontiri o nyaka tšhelete ya go balelwa R9m gore mošomo o fele,” James Klement wa khamphane ya Senyati a realo.

Mošomo o mongwe o mogolo wo o filweng khamphane yeo ke wa go

dira sekontiri seo se fetang kgauswi le bookelo bja Matlala motseng wa Tsimanyane.

Mo mošomong wa sekontiri go dirilwe tsela ya go lekana 17 km efela mokero wa go sepetša meetse ga se o dirwe. Tšhelete ka moka yeo rakonteraka a swanetšeng go e fiwa e balelwa go R63 milione gore a dire mošomo wa gagwe ka bothakga go fihla mafelelong.

Klement o re bašomi ba go lekana 100 ba ile ba swanelwa ke go fokotšwa ka lebaka la go emišwa ga mošomo. Dikonteraka tšeo ka bobedi di emišitšwe pele nako ya tšona e fihla mafelelong.

Phello Makobe, yo e lego modudi wa Phokwane e bile e le mokgokaganyi wa bosetšhaba wa SA Maintenance and Estate Beneficiaries Association (Sameba) o re o lekile go tsena taba yeo ka bogare a palelwa. “Kgoro e re tshepišitše go tla kopanong eupša ya se iponagatše”. Makobe a realo.

Seboleledi sa Kgoro, Joshua Kwapa, o re: “Re ka se kgone go bolela ka taba yeo go fihlela re tlo e lokiša.”

BATHEKGI BA MATHALE BA JEWA KE DIKGETHO

Thanyani Masithi

POLOKWANE: Mokgatlo wa go emela bašomi wa Cosatu o swere kopano ya go kgetha boetapele ka Polokwane beke ya go feta. Gona mo khonfereseng, mongwaledi wa profense wa Cosatu Mna Sebabi, o kgethilwe leboelela mola modulasetulo Ronny Morwatshehla a paletšwe ke go se tsokama gape.

Sebabi, yo nakong ye e fetileng a bego a elwa ntwa ya gore Mathale a itokolle ka lebaka la manyofonyofo a dithentara, o hlotše Gerald Twala, yo e lego mongwaledi wa profense wa SA Municipal Workers Union (Samwu), mo dikgethong. Twala ke yo mongwe yo a bonwang a le kampeng e tee le tonakgolo Cassel

Mathale mo go ANC. Morwatshehla, yo maemo a gagwe a bodulasetulo a tšerwego ke motlatšamodulasetulo wa gagwe, Essop Mokgonyana, wa National Union of Mineworkers (NUM), le yena o bonwa bjalo ka mothekgi wa Mathale.

“Ye ke phenyo kgahlanong le bomenetša. Mokgonyana le Sebabi ba ka lehlakoreng le tee la go lwantšha bosenyi ka mokgatlong wa ANC,” gwa realo moemedi wa Nehawu yo a bego a thabile kudu.

“Re na le sekgopi le tonakgolo Cassel Mathale ka lebaka la goreo hlotlile Nehawu ka mangwalo a kgorotsheko e le ge maloko a

Nehawu a le kgahlanong le bomenetša mogwantong wo o bego o swaretšwe dikantorong tša mmušo wa profense tša Mowaneng.

Mohlankedi wa mokgatlo o re: “Mo profenseng bathekgi ba Mathale ba hloloswa bjalo ka bao ba thekgang motlatšamopresitente Kgalema Motlanthe mola bao ba bego kgahlanong le Mathale e le bao ba thekgang mopresitente Jacob Zuma khonferenseng ya go kgetha boetapele kua Mangaung ka kgwedi ya Manthole.

Morwatshehla, yo e lego modulasetulo wa Sadtu, e lego o mongwe wa mekgatlo yeo e

šomišanago ka mokgatlong wa Cosatu e bile e na le bathekgi ba bantši, o arogantše barutiši ka ge ba bangwe ba nyaka Zuma gore a kgethwe gape mola ba bangwe ba tloga ba nyaka diphetogo. Ke seo se dirileng gore Morwatshehlawa a lahlegelwe ke thekgo ya maloko ka gore yena o ema le Cassel Mathale.

Motlatšamodulasetulo wa profense, Rangers Molapo, o kgethilwe leboelela a sa phenkgišane le motho. Molapo ke leloko la NUM efela bobedi bo fapana ka mešomo ka gare ga mekgatlo ya moepong.