Seipone News

Ka ga Seipone 

 Baphatlalatši ba Balaodi ke feme yeo e lego ya bathobaso 100% yeo e ngwadišitšwego ka 2000. Morero wa feme ye ke go fa šedi maleme a SeAforika a Aforika Borwa ka go amega go kgodišo le tlhabollo ya wona. Feme e amega morerong wo ka go phatlalatša dingwalwa tša go swana le dikuranta, dimakasine, dipuku le tše dingwe ka maleme a.

Kuranta ya Seipone e hlomilwe ka Phato (Agosetose) 2002 e le kuranta yeo e phatlalatšwago ka maleme a mararo a e lego Sesotho sa Leboa /Sepedi, Xitsonga le Tshivenda gomme e bitšwa Seipone / Xivoni / Tshivhoni. Kuranta e be e tswaka maleme a gomme e phatlalatšwa ditikologong tšeo a bego a bolelwa Limpopo le karolo ya Mpumalanga. Ka morago ga ditlhotlo tšeo e kopanego natšo, kuranta e ile ya thoma go phatlalatšwa ka Sesotho sa Leboa / Sepedi feela go thoma ka 2008 ka nepo ya go fokotša ditshenyegelo.

Mo lebakeng le, Seipone se phatlalatšwa bjalo ka kuranta ya bekepedi. Kuranta e phatlalatšwa e le kgatišo ya matlakala a 12 ka mebala ya bošweu le boso le mebala ya go kganya. Palo ya matlakala a mebala ya go kganya e laolwa ke palo ya dipapatšo tšeo kgatišo e nago natšo tša mebala ya go kganya. Go kgatlwa dikhophi tše 10 000 ka kgatišo goba 20 000 ka kgwedi. Kuranta e phatlalatšwa dimasepaleng tša selete tša Capricorn, Sekhukhune, Waterberg le dikarolo tša Mopani mo Limpopo fao Sesotho sa Leboa / Sepedi se bolelwago kudu.

BATHO BA SEIPONE
Sehlopha sa Seipone se arotšwe ka magoro a mane:

Basepediši:

Diphete Bopape
O šoma bjalo ka molaodi le morulaganyi wa kuranta yo a hlokometšego taolo ya feme ka bophara.

Mothopane Phaalama
O šoma bjalo ka molaodi wa ofisi yo a laolago merero ka moka ya ofisi go akaretšwa megala, kamogelo ya baeng, merero ya ditšhelete le direkoto tše dingwe, merero ya bašomi, tirišano le bareki le batho ka kakaretšo. Gape o šeditše merero ya phatlalatšo le go amogela dikgokgono go tšwa go bašomi le bakgathatema ba bangwe.

Boraditaba:

Mamiriri Shai
O šoma bjalo ka raditabamogolwane yo a hlahlobago le go hlokola ditaba tša boraditaba, go fetolela ditaba tšeo di nyakago phetolelo bjalo ka karolo ya go di lokišetša kgatišo. Gape o kgoboketša ditaba masepaleng wa Selete sa Mopani

Thabo Maenetja
O šoma bjalo ka raditaba yo a kgoboketšago ditaba masepaleng wa Selete sa Waterberg.

Malesela Selokela
O šoma bjalo ka raditaba wa go kgokologa yo a kgoboketšago ditaba dimasepaleng tša dilete tša Capricorn, Waterberg, Sekhukhune, Waterberg, Mopani le Vhembe.

Thanyani Masithi
O šoma bjalo ka raditaba yo a kgoboketšago ditaba kudu tikologong ya Capricorn fao šedi ya gagwe e lebišitšwego go ditaba tša basadi.

Babapatši:

Mokane Malatji 
Modiro wa ga gwe ke go kgoboketša dithekišo go tšwa go borakgwebo ba praebete, dikgoro le makala a mmušo.

Baphatlalatši:

Leyden Phaahla le Bushy Rapudi
Boikarabelo bja bona ke go phatlalatša le go rekiša kuranta dikarolong tšeo di fapanego tša profense ka go diriša dikolo, barekiši ba mebileng, mabenkele, dikhefi, dikaratšhe, dispaza le mafelo a mangwe a kgwebo.